اسرار نجاح الصابلي ام وليد
1)- ليدام او الزيوت بالمعنى زبدة / زيت :
* يجب احترام المقادير :
الكيلة لي فيها : 250 غ زبدة تحتاج :125 غ سكر + صفار بيضة +بيضةكاملة + نصف باكي خميرة+ فاني+ فرينة .
الكيلة لي فيها : 500 غ زبدة ، تحتاج : 250غ سكر + 2-3 صفار + 2 بيضة كاملة+ باكي خميرة+ فرينة.
◾عجينة الصابلي عندها مقادير مضبوطة حيث :
*كمية المرغرين تكون نصف كمية الفرينة و كمية السكر هي نص كمية المرغرين.
يعني اذا درتي باكي مرغرين تاع 250 غ يعني تستعملي 500 غ فرينة و 125 غ سكر هاذي مقادير تقريبية وعمومية
ممكن تزيدي و لا تنقصي شوية الفرينة على حساب واش تاكلك العجينة بصح هذا هو المبدأ تاع الصابلي
2)- البيض🥚...في القاطو صفار البيض يهشش العجينة و البياض ييبسها
علي هذا و اذا حبيتي يجيك هشيش بزاف استعملي صفار البيض باش اطمي لعجينة احسن ما تستعملي بيضة كومبلي يعني.. 250 غ مرغرين لازملها 2 حبات بيض... أنت في عوض أديري 2 حبات كاملين... ديري 2 صفار و حبة كاملة...
او تستغناي علا البياض نهائيا
3)- المايزينة.... تقدري أتلمي العجينة بالفرينة وحدها و تجي مليحة بصح كي تزيديلها شوية مايزينة تجي هشيشة بزاف... يعني اذا حبيتي الصابلي تاعك يجي يقرمش شوية ديري الفرينة وحدها و اذا حبيتيها تجي مرملة كيما الغريبية زيديلها مايزينة...هاذي مسالة ذوق انا مرات نديرو بالفرينة وحدها و مرات نزيدلها مايزينة يعني القوام أللي يتبدل برك
4)- الزيت.... حنونة اذا زدتي شوية زيت رح يجيك الصابلي محمر، بحيث:
الكيلة تاع 500 غ زبدة ضيفي في العجينة نص كأس زيت.
الكيلة تاع 250 غ زبدة ضيفي في العجينة 2 مغارف زيت.
5)- السكر.. حبيبتي استعملي السكر الرطب ڨلاصي أحسن وافضل، لأن السكر العادي يبس العجينة، وريقلي السكر في الاضافات ضرك تفهميني،
6)- الاضافات: 🍫🍯
حنونة نضيف في صابلي تاعي وش نبغي:
زبيب مفور، حلقوم مقطع صغير، كاوكاو ، جلجلان، مكسرات علا العموم،بودرة كاكاو وملونات غذائية، قهوة ، نيسكافيه، شامية ، عسل، باطة فلان ، واكيد النكهات لي غوم يعطوك لون وذوق وريحة.. طبعا رح نوضح:
كيلة 500غ زبدة نضيف كأس من الإضافات.
كيلة 250غ زبدة نضيف نصف كأس من الإضافات.
نقدر نعوض مثلا في العجينة بلاصة السكر فلان او عسل طبعا مرات حبة قاطو متقدريش تاكليها من حلاوتها ، حبيباتي نحن معرضين للاصابة بامراض بسبة الملح زايد وسكر زايد ريقلو السكر ونقصوه أنا شخصيا اذا رح نغلف الصابلي بشكولاطة أو طلية نقص سكر في العجينة ، اذا رح نلصقو بكريمات حلوة أيضا نقص في العجينة
7)- الخميرة:
كيلة 500غ زبدة تحتاجي 1 باكي خميرة.
كيلة 250غ زبدة تحتاجي نص باكي خميرة .
حنونة اذا كان عندك صابلي بريستيج وتحتاجي الصابلي يجيك قد شكولاطة بريستيج اما تستغناي علا الخميرة أو :
كيلة 500غ زبدة ديري نص باكي خميرة.
كيلة 250غ زبدة تحتاجي رشة فقط.
في أغلب الاحيان نستغنى عليها
8)- حبيبتي لما تلمي العجينة ما تعجنيهاش لميها برك.و لازم تخليها طرية ...هذا ثاني مبدا في القاطو... عجينة تلميها طرية مي تطيب تجيك طرية و اذا لميتيها يابسة أكيد في الفور تيبس أكثر ...علي هاذي قلتلك في الصابلي ديما كيلي الفرينة تكون دوبل كمية ليدام سيريها مليح و حطيها قدامك باش ما تفوتيش هاذ الكمية
* إذا صابلي سامبل خليها طرية
* إذا صابلي سيليكون خليها تتلاصق ولما تجي تحطيها في المول بللي يدك بالزيت وكوريها رطبيها وحطيها فيه .. متضغطيش لو ضغطتي تجيك مصموتة ومتطيبش تقعد خضراء من داخل ومتعمريش المول فيها الخميرة رح تطلع وتخرجلك علا المول.
9)- لما تلمي العجينة مذابيك غلفيها بسيلوفان و ترتاح في الفريجيدار من 15-30 دقيقة تجيك ساهلة ورطبة
10)- لما تحلي العجينة تاعك من الاحسن تحليها فوق ساشي باش ما ديريش الفرينة باسكو كيما قلتلك كمية ليدام في الصابلي محسوبة لوكان تحليها بفرينة بزاف قادرة تنشفي لعجينة و تجيك يابسة
11)- حبيبتي فرشي ورق الطهي رح يسهلك المهمة او رشي فرينة لكن لما يطيب الصابلي مذابيك تنفظيه مليح علا خاطر مش رح يلصق مليح
12)- متحمريش الصابلي رح يجي يابس خليه أبيض احسن شيء، ثم خبيه في علبة محكمة الاغلاق .. من الاحسن ماتلصقيهش وهو ساخن رح يشرب الكريمة او الكونفيتير وتختفي طبقة هاذي،
13)- كريمات التلصيق أيضا مذا بيك يكونو باردين، كريمة الزبدة، كونفيتير كرام شانتيي نيسلي كراميل ، حليب محلى وحتى توفيا،
14)- حبيبتي⚠️ انتبهي⚠️ لانك تلصقي الصابلي بكريمة فيها بيض مدة الاستهلاك ماتتعداش 10 ايام في الفريجيدار يولي اخضر ويسبب تسمم
15)- بالنسبة للصابلي المرشوش بالسكر رطب أنا شخصيا نطيب شاربات ( كأس سكر وكأس ماء وشريحة ليمون يغلو 5 دقاىق) وهو دافيء نمسح بيه سطح الصابلي ونرش سكر رشة خفيفة ونعاود مرة اخرى فوقها،
16)- بالنسبة للمشكل تاع صابلي نحطو فوق بعض يروح سكر🤔 ؟؟؟؟ طبعا حبيبتي ننصحك ترتبيه وتحطي فوقو ورقة عادية تزيدي طبقة قاطو وفوقها ورقة اخرى،
■الوصفة المعتمدة دائما 💗وأبدا 500غ زبدة+ كأس ونص سكر رطب+ 3 صفار بيض + بيضة كاملة+ كاس مايزينة+ نص كاس زيت+ باكي خميرة (في صابلي سيليكون نزيد باكي ونص ، في صابلي برستيج ندير نص باكي) ونزيد كأس من الاضافات ونلم بالفرينة .تحياتي